Kórónuveirusmit kom upp á sængurlegudeild Landspítalans í gærkvöldi, en nýbakaður faðir reyndist smitaður. Vísir greinir frá þessu. Maðurinn hafði verið á spítalanum með móður og barni í tæplega viku. Hann hafi meðal annars verið á vökudeild. Reglur hafi nú verið hertar.

Ingibjörg Hreiðarsdóttir yfirljósmóðir segir þetta grafalvarlegt. „Þegar grunur kemur upp um smit og við getum staðfest smit erum við í samstarfi við farsóttarnefnd Landspítala og það er farið í að rekja ferðir þeirra. Það eru allir skoðaðir sem viðkomandi hefur hitt og sett í sóttkví sá hópur sem viðkomandi hefur verið í námunda við […] Þetta getur verið alveg töluvert stór hópur. Starfsemin er mjög viðkvæm, hún er mjög sérhæfð eins og öll önnur starfsemi á spítalanum og við getum auðveldlega misst niður alla starfsemi ef að smit breiðist víða út,“ segir Ingibjörg í samtali við Vísi.

Eftir þetta verður mökum ekki leyft að vera með móður og nýbura á meðgöngu- og sængurlegudeildina eftir fæðingu.