Þorsteinn Gunnarsson, settur forstjóri Útlendingastofnunnar, var gestur í útvarpsþættinum Harmageddon í dag. Þar ræddi hann um undanfarnar ákvarðanir stofnunarinnar, meðal annars mál íranska unglingsdrengsins Manís Shahidi og fjölskyldu hans. Málið hefur vakið upp mikla reiði gagnvart Útlendingastofnun og stjórnvöldum í netheimum.
Þáttarstjórnandi Harmageddon spurði Þorstein meðal annars hvort það væri ekki forsenda til þess að taka Maní inn þar sem hann er trans strákur frá Íran. „Þar sem við viljum breiða út faðminn gagnvart þeim sem eru í viðkvæmri stöðu,“ segir þáttarstjórnandinn.
Þorsteinn segir Útlendingastofnun gera það en bara „ef það telst ástæða til þess“. „En ef það á að vera bara útaf þeirri forsendu að einstaklingurinn sem um ræðir tikkar í einhvern ákveðinn þjóðfélagshóp og við tökum hann þá yfir óháð því hvert hann á að fara. Það er þá bara atriði sem yrði að útfæra í þeim reglum sem við erum að fara eftir. Fyrir okkur liggur það verkefni að við þurfum að fara eins með alla sem fara í gegnum kerfið.“
Í þættinum bendir Þorsteinn á það að Maní verði sendur til Portúgals. Þá segir hann að réttindi hinsegin fólks séu mjög góð þar í landi. Í heimalandi Manís, Íran, er staðan þó önnur en réttindi hinsegin fólks eru mun verri en gengur og gerist hér á landi.
Í lok þáttarins var Þorsteinn spurður hvort það væri hægt að brúa bilið milli vilja almennings og löggjafans í þessum málum. Þorsteinn sagði þingið þurfa að skoða löggjöfina, það væri hlutverk kjörinna fulltrúa að gera það en ekki Útlendingastofnunar.
