Um helgina var lögregla kölluð til í Kórahverfi vegna kvartana um hávaða vegna flugeldaskota, en þetta kom fram í dagbók lögreglunna í gærmorgun. Er þetta ekki í fyrsta skipti sem slíkt gerist.
Umræður eru um málið í íbúahópi Kórahverfis á Facebook. Er meintur sökudólgur í málinu þar nafngreindur og hann sagður vera innflutningsaðili flugelda. Maðurinn er þar hvattur til að stíga fram og biðjast afsökunar á athæfi sínu. Maður sem skrifar um málið segir að líklega séu fáir í hverfinu sem ekki hafi orðið varir við flugelda sem skotið hafi verið frá tilteknu húsi í Kórahverfi aðfaranótt sunnudags. Síðan nafngreinir hann manninn og ritar heimilisfang hans. Í skrifum íbúans kemur fram að fjöldi íbúa hafi kvartað undan hávaða af flugeldaskotum frá þessum sama manni og sama heimili:
„Við héldum að þessu væri lokið eftir hörð viðbrögð fyrr á árinu, en greinilegt er að þú ert ófær um að taka tillit til bæði manna og málleysingja. Það var því mikill fjöldi nágranna þinna sem þurfti að sinna börnum sem og gælu- og húsdýrum langt fram eftir nóttu í gær. Í samtali mínu við lögregluna kom að minnsta kosti fram að mikill fjöldi íbúa hringdi í nótt til að leggja fram kvörtun vegna athæfis þíns og röskunar á almannafriði. Það er vel.Ég hef heyrt það hér að þú sért innflutningsaðili að þessum sprengjum og vakna því upp spurningar um hæfi þitt til meðferðar á jafn hættulegum varningi, hér mitt í þéttri íbúabyggð.Samkvæmt reglugerð gefur lögreglustjóri út leyfi til innflutnings og sölu á flugeldum og því er ekki úr vegi að ábyrgir íbúar þessa góða hverfis, taki sig saman, lýsi yfir efasemdum um hæfi þitt til innflutnings á skoteldum í flokki 2 og hærra og leggi fram formlega kvörtun vegna hegðunar þinnar. Vegna truflunar á almannafriði og þeirri hættu sem þú leggur nágranna þína endurtekið í, með því að vera, í að því er virðist misjöfnu ástandi að kveikja í þessum sprengjum.“
„Þá væri rétt að vísa til endurtekinna skota utan leyfilegs tímabils, endurtekinna kvartana til lögreglu og áhyggjum yfir að einstaklingur með slíka og augljósa bresti í áhættuvitund, sé talinn hæfur til að flytja inn og geyma jafn hættulegan varning og þessir skoteldar eru.Ég er alveg vel í meðallagi umburðalyndur og veit að í eðlilegu samfélagi koma upp atriði sem við þurfum að umbera þó okkur sé það kannski þvert um geð. En um þessi atriði gilda reglur. Flestar skrifaðar og sumar óskrifaðar. Og þegar menn eins og þú ganga reglubundið fram með íkveikju á sprengiefni sem dygðu í meðal hryðjuverk, þá brýtur þú allar þessar reglur, þú brýtur traust þá þrýtur þolinmæðin.En, þú hefur auðvitað tækifæri hér, til að sýna iðrun og biðjast afsökunar á þessum síendurteknu brestum og vona ég innilega að þú finnir í þér manndóm til að gera það. Þér liði við það betur og þú hefðir held ég bara svolítið gott af því að skoða veröldina frá fleiri, tillitsamari og víðari sjónarhornum.“
