Þann 18. nóvember tekur ný reglugerð heilbrigðisráðherra gildi sem kynnt var fyrir helgi. Kveður hún á um að grímuskylda verði áfram fyrir alla, nema þá sem framvísað geta vottorðum um að hafa fengið Covid-19.
Hagar, sem meðal annars reka Hagkaup, Bónus, Útilíf, Olís og Zara, hafa nú tilkynnt að eftir sem áður verður grímuskylda í verslunum þeirra, hvort sem viðkomandi geti framvísað vottorð um ónæmi eða ekki. Þetta kemur fram í tilkynningu frá Högum. Þar segir: „Til að huga að öryggi starfsfólks og viðskiptavina og minnka álag í verslunum, verða viðskiptavinir í verslunum Haga áfram skyldugir til að bera grímu, hvort sem þeir hafi fengið COVID-19 eður ei.“
Grímuskyldan í verslunum Haga verður til og með 2. desember.
Í tilkynningunni segir Finnur Oddsson, forstjóri Haga, að mikið hafi mætt á starfsfólki verslana þeirra síðustu mánuði og að reglugerðin sé til þess fallinn að auka það álag til muna. „Til að minnka það álag og efla samstöðu höfum við ákveðið að halda grímuskyldu í okkar verslunum óbreyttri frá því sem áður var og vonum að viðskiptavinir sýni þessu fyrirkomulagi skilning. Hingað til höfum við unnið vel með stjórnvöldum og fylgt allra þeirra reglum í hvívetna. Með nýrri reglugerð um grímunotkun er þó verið að setja verslunarfólk í erfiða stöðu og til að koma í veg fyrir óþarfa spennu og árekstra í verslunum okkar tókum við þessa ákvörðun með hag starfsfólks og viðskiptavina okkar að leiðarljósi. Við vonum að viðskiptavinir taki vel í framtakið því að okkar mati er samhent átak og öflugar sóttvarnir lykillinn að árangri,“ segir Finnur.
