Þórólfur Guðnason sóttvarnalæknir svaraði fyrir hertar aðgerðir sóttvarnayfirvalda á blaðamannafundi í dag. Sagði læknirinn að honum þætti skiljanlegt að menn séu ekki á eitt sáttir við aðgerðirnar, en á endanum þyrfti að taka einhverjar ákvarðanir. Þórólfur nefndi gagnrýni sem komið hefur fram um að takmarkanir séu látnar gilda jafnt á alla landshluta, enda hefur þorri smitanna greinst á höfuðborgarsvæðinu. Sagði Þórólfur að besta leiðin til þess að kveða niður þessa bylgju í eitt skipti fyrir öll væri að grípar til harða aðgerða.

59 manns greindust með Covid í gær, og voru 34 í sóttkví. Það er talsvert hærri hlutfall en verið hefur síðustu daga. Aðeins þrír greindust utan höfuðborgarsvæðisins.

Sagði Þórólfur að athyglisvert væri að skoða smitrakningu nýju smitanna. „Það virðist vera sem svo að þetta eru hópar sem eru að smitast á vinnustöðum, innan fjölskyldna, í vinahópum sem eru að hittast og gera sér glaðan dag, og líkamsræktarstöðvum. Mörg smit voru rekin á hnefaleikastöð í Kópavogi og á krár. Þetta eru þær upplýsingar sem við notum þegar við leggjum til þessar takmarkanir og byggjum okkar ákvarðanatöku á.“

Þórólfur sagði að nú væri ljóst að við gætum farið að sjá alvarlegri faraldur með alvarlegri afleiðingum en landsmenn hafa séð nýlega. Þá sagði Þórólfur að mikið álag væri á landspítalanum. Nú eru 648 í einangrun og eftirfylgni hjá Covid göngudeildinni. 15 eru á sjúkrahúsi í dag, þar af 3 á gjörgæslu og 2 í öndunarvél.

Þórólfur lagði mikla áherslu á að engin merki væru um það að sjúkdómurinn nú væri eitthvað vægari en hann hefur verið áður.