Maður hefur verið dæmdur í fimm ára fangelsi fyrir Landsrétti fyrir hrottalegt ofbeldi gegn unnustu sinni. Ofbeldið stóð yfir í þrjá daga, frá 5. til 7. október árið 2019. Samkvæmt lýsingu í dómi héraðsdóms, sem maðurinn áfrýjaði til Landsréttar, nauðgaði hann konunni, barði hana með hnefa í andlit, höfuð og líkama, risti skurð á hægra læri hennar með hnífi, sparkaði í hana, tók hana kverkataki þar til hún gat ekki andað, reif í hár hennar, reyndi að bíta hana og klippti hluta af hári hennar. Hann hótaði henni ítrekað frekara ofbeldi og lífláti og ógnaði henni með sprautunálum.
Ofbeldið átti sér stað á dvalarstað parsins í Reykjavík og sumpart á nærliggjandi stöðum þar sem stúlkan leitaði skjóls fyrir ofbeldinu. Vegfarendur sem sáu manninn trylltan með exi á lofti tilkynntu það atvik til lögreglu og það leiddi til þess að maðurinn var handtekinn.
Meðal rannsóknargagna fyrir héraðsdómi voru hljóðupptaka af símtali konunnar í Neyðarlínu og fjarskiptamiðstöð lögreglu mánudagsmorguninn 7. október. Á upptökunni heyrðist hún hringja eftir aðstoð og vera í miklu uppnámi. Sagði hún frá því að maðurinn hefði verið að misþyrma sér en hann hefði skroppið frá til að kaupa mat. Hún sagði síðan orðrétt: „Hann kemur til baka eftir smá, þið verðið að koma núna, annars drepur hann mig.“
Fyrir dómi neitaði maðurinn sök. Hann áfrýjaði málinu til Landsréttar og vænti sýknu. Landsréttur staðfesti hins vegar dóm héraðsdóms og er maðurinn dæmdur í 5 ára fangelsi og til greiðslu skaðabóta til konunnar að fjárhæð 3 milljónir króna.
