293 misstu vinnuna þessi mánaðamót í átta hópuppsögnum samkvæmt Unni Sverrisdóttur, forstjóra Vinnumálastofnunar. Vegur þar þyngst uppsögn Icelandair sem DV sagði frá í gær á 88 starfsmönnum, þar af 68 flugmönnum. Þá sagði Borgun upp 13 manns.

Samtök atvinnulífsins hafa spáð því að allt að 30 þúsund manns yrðu atvinnulaus í lok árs. Aðspurð í kvöldfréttum Stöðvar 2 í kvöld hvort þetta gæti orðið staðan sagði Unnur það ekki ríma við spár Vinnumálastofnunnar. Spár þeirra gera ráð fyrir „25 þúsund atvinnulausum, kannski 26 þúsund.“ Aðspurð hvort 25 þúsund á atvinnuleysisskrá yrði söguleg tala svaraði hún „já já, þetta er allt saman orðnar sögulegar tölur.“

Til viðbótar við þá 293 sem misstu vinnuna í hópuppsögnum má gera ráð fyrir að hundruðum hafi verið sagt upp í mánuðinum til viðbótar. Samkvæmt lögum og reglum skal atvinnurekandi tilkynna hópuppsögn til Vinnumálastofnunar, en einstaka uppsagnir eru ekki tilkynningarskyldar. Gera má ráð fyrir að flestir þeir sem misstu vinnuna í dag séu með þriggja mánaða uppsagnarfrest. Það má því reikna með að þau verði á launum út árið, en atvinnuleysistryggingasjóður Vinnumálastofnunnar taki þá við þeim sem ekki hafa fundið sér nýja vinnu fyrir það.

Fyrstu þrjá mánuði á fólk sem misst hefur vinnuna rétt á tekjutengdum atvinnuleysisbótum. Að þeim tíma loknum fer fólk á lágmarksbætur, sem eru 289.510 krónur.