Ástæðan fyrir þessari færslu Steinunnar er að yfirvöld hafa nú auglýst formlega eftir Kehdr-fjölskyldunni sem hefur farið huldu höfði í tæpa viku. Vísa átti fjölskyldunni úr landi þann 16. september síðastliðinn en fjölskyldan fannst ekki. „Ég hef ekki heyrt í þeim og það er slökkt á símunum þeirra. Ég heyrði ekki í þeim í gær og hef ekki heyrt í þeim í dag,“ sagði Magnús Davíð Norðdal, lögmaður egypsku fjölskyldunnar, daginn sem brottvísunin átti að fara fram.
„Ég vil hvetja til borgaralegrar óhlýðni við þessar einstöku aðstæður og vara fólk við því að gerast leynilöggur og uppljóstrarar fyrir yfirvöld,“ segir Steinunn í færslunni. „Ég held að með því að segja til ferða þessa fólks eða dvalarstaðar sé viðkomandi að valda sjálfum sér ævarandi sálarskaða. Því það að svíkja þetta fólk í sinni neyð eru svik við mennskuna sjálfa. Slíkur skaði er aldrei aftur tekinn og veldur öllum manneskjum sem á annað borð finna til samkenndar með öðrum óbætanlegu tjóni og lífstíðarharmi sem upprætist aldrei.“
Steinunn botnar færsluna með því að segja hve mikið afl getur búið í þögninni. „Stundum getur maður nefnilega hjálpað öðrum og bætt heiminn með því að þegja sem fastast. Það reynist mörgum erfitt en þögnin er stundum bæði grjóthart vopn og verndandi afl.“
