Sævar Þór Jónsson, lögmaður, fer með mál konu sem sem ætlar að leita réttar síns vegna mistaka Krabbameinsfélags Íslands við sýnatöku. Hann greindi frá því í samtali við Vísi í dag að fyrirspurnum rigni yfir hann frá áhyggjufullum konum og aðstandendum sem vilja kanna rétt sinn vegna mögulegra mistaka við greiningu hjá Krabbameinsfélaginu.

Sævar segir að sér hafi borist beiðnir um að skoða tólf mál krabbameinssjúklinga eða aðstandenda þeirra. Af þessum tólf málum ætlar Sævar að skoða þrjú nánast.

Þessi þrjú mál varða einstaklinga sem hafa greinst með krabbamein, einn þeirra er látinn.

„Ég tel rétt að skoða þessi mál til hlítar og kanna þá frekari gögn í þeim málum. En það er of snemmt að segja til um frekari framvindu þeirra.“

Sævar telur rangt að kenna einhverjum einum starfsmanni félagsins um mistökin. Kerfinu sé stýrt af Krabbameinsfélaginu og beri það því ábyrgð.

Frá því hefur verið greint að starfsmaðurinn sem misgreindi sýni konu sem hefur nú greinst með ólæknandi krabbamein hafi glímt við heilsubrest. Tugir kvenna fengu ranga niðurstöðu um frumubreytingar í leghálsskoðun hjá Krabbameinsfélagi Íslands árið 2018 og vinnur félagið nú að því að endurskoða 6000 leghálssýni.