Morgunblaðið  tekur upp í Staksteinum sínum grein af Vefþjóðviljanum þar sem farið er hörðum orðum um hinar hertu sóttvarnaraðgerðir sem gripið var til í ágústmánuði og fela í sér tvöfalda skimun á þeim sem koma til landsins með fimm daga skimun inni á milli.

Í Staksteinum segir:

„Þegar gripið var til aðgerða í vor var mikil samstaða meðal þjóðarinnar og skoðanir lítt skiptar, hvað þá að hörð andmæli heyrðust. Nú eru á hinn bóginn talsverðar umræður og gagnrýni á þá leið sem stjórnvöld – eða sóttvarnayfirvöld – hafa valið í baráttunni við veiruna. Þessi umræða er mikilvæg enda aðgerðirnar harðar og mega aldrei verða „nýtt normal“ eins og sumir hafa orðað það.“

Vefþjóðviljinn heldur því fram að seinni bylgja COVID sem fór af stað í júlí út frá tveimur hópsýkingum hafi reynst miklu vægari en faraldurinn var þegar hann náði hámarki í vor:

„En þegar komið er fram í ágúst hefur seinni bylgjan tekið aðra og betri stefnu en sú fyrri. Enginn vafi er á því að eftir að fyrstu innanlandssmitin um nokkurra
vikna skeið greindust í lok júlí höfðu landsmenn aukinn vara á sér í samskiptum, ekki síst þegar viðkvæmir einstaklingar eiga í hlut. Þar kom reynslan frá í vor að góðum notum. Einstaklingsbundnar sóttvarnir virkuðu. Kúrfan var orðin flöt og jafnvel á niðurleið.

Þess vegna er illskiljanlegt hvers vegna gripið var til svo afdrifaríkra takmarkana á landamærunum.“

Harmað er það tjón í efnahagslífinu sem hinar hertu aðgerðir hafi valdið og því haldið fram að þær hafi verið ástæðulausar:

„Allt hnígur því að því að lokunin hafi verið ástæðulausog litlum ef nokkrum ávinningi skilað. Tjónið í efnahagslífinu og skerðingin á borgaralegum réttindum manna er hins vegar öllum ljóst.“