Síðastliðið laugardagskvöld áttu hópslagsmál sér stað í miðbæ Reykjavíkur. Fréttablaðið greindi frá því í gær að Sigrún Helga Lund, tölfræðingur og fyrr­verandi Ís­lands- og Evrópu­meistari í Brasilísku Jiu Jitsu, hafi stöðvað slagsmálin. Í dag fékk hún símtal frá föður drengsins sem varð fyrir ofbeldinu.

„Ég spretti bara út þegar ég sá að það var hópur að sparka í liggjandi mann. Það eina sem ég gerði var að hlaupa inn í hópinn og skamma þá, þá fuðraði hópurinn upp um leið,“ sagði Sig­rún í sam­tali við Frétta­blaðið í gær en hún var stödd á bar þegar slagsmálin voru í gangi.

Faðir drengsins sem varð fyrir ofbeldinu og lá í jörðinni hringdi í Sigrúnu í dag til að þakka henni fyrir. „Ég er í smá losti eftir símtal frá klökkum pabba sem þakkaði mér fyrir að hafa bjargað lífi sonar síns,“ segir Sigrún á Twitter-síðu sinni í dag en Fréttablaðið vakti athygli á tísti Sigrúnar. „Pössum uppá hvert annað og segjum nei við ofbeldi.“

Tíst Sigrúnar hefur vakið mikla athygli á samfélagsmiðlinum en hundruðir manna hafa líkað við tístið. Dagur B. Eggertsson, borgarstjóri Reykjavíkur, skrifar athugasemd við tíst Sigrúnar og þakkar henni fyrir. „Frábærlega gert og ótrúlega hugrakkt, þér er ekki fisjað saman! Takk innilega fyrir þína framgöngu.“