Eyjamenn eru uggandi yfir stöðu í samgöngum til og frá Eyja og horfurnar framundan dræmar. Í vikunni sagði Herjólfur ohf. upp öllu starfsfólki Herjólfs. Sagði forstjóri Herjólfs ohf. að það hefði verið óforsvaranlegt rekstrarlega að halda starfsfólki í vinnu. Starfsfólkið er á uppsagnarfresti til 1. desember, og siglingar því tryggðar fram undan. Eftir það er staðan óljós.

Í dag greindu svo Eyjafréttir frá því að flugfélagið Ernir hafi ákveðið að hætta öllu áætlunarflugi til Vestmannaeyja í vetur. Að sögn Eyjafrétta kemur það fram í tilkynningu sem flugfélagið sendi frá sér. Stjórnendur félagsins telja ekki ráðlagt að halda inn í veturinn að óbreyttu. Rímar það að fullu við orð forstjóra Herjólfs í gær.

Njáll Ragnarsson, oddviti Eyjalistans og formaður bæjarráðs Vestmannaeyja, segir ákvörðun Ernis vera mikil vonbrigði og aðdragandinn hafi verið stuttur. Flugsamgöngur eru engin lúxus. Öryggi Eyjamanna sé undir, auk þess sem að atvinnulífið reiði sig á eins öruggar flugsamgöngur til Eyja og náttúran leyfir.

Félagið segist þó vera í stakk búið til að hefja flug aftur til Eyja án mikils fyrirvara og að það muni bjóða upp á leigu flugvéla til að koma hópum til og frá Vestmannaeyjum. Eins og sakir standa nú, segir í tilkynningunni, er ekki næg eftirspurn til að réttlæta reglulegt áætlunarflug til Vestmannaeyja.

Þeir sem DV ræddu við í dag og kvöld eru uggandi yfir fréttunum. Bentu þeir á að Herjólfur sé þjóðvegur Eyjamanna og flugsamgöngur nauðsynlegt öryggistæki sem færir Eyjamenn örlítið nær nauðsynlegri þjónustu sem aðeins sé veitt á höfuðborgarsvæðinu.

Einn viðmælandi DV sem vildi ekki koma fram undir nafni hafði á því orð að nú væri frjór jarðvegur fyrir umræðu um jarðgöng til Eyja. „Hvort sem fólki líkar það betur eða verr, hefur stjórnvöldum ekki tekist að leysa samgönguvandann til Eyja með varanlegum hætti. Herjólfur var úreltur, svo var Þorlákshöfn of langt í burtu, svo var Landeyjahöfn full af sandi, svo var Herjólfur of lítill, svo var hann of stór. Fyrst gat ríkið ekki rekið Herjólf, svo getur bærinn ekki rekið Herjólf. Fyrst gat Flugfélagið ekki flogið hingað, svo Ernir. Nú er ekkert flug og rekstur Herjólfs í lamasessi. Hvað næst?“