Kona var tekin með mikið magn af kannabisefni í Flugstöð Leifs Eiríkssonar fyrr í mánuðinum. Þetta kemur fram í tilkynningu frá lögreglunni á Suðurnesjum.

Hún var að koma frá Malaga á Spáni þegar tollgæslan stöðvaði hana. Í ferðatösku sinni reyndist hún vera með tæp fimmtán kíló af efninu. Lögreglan á Suðurnesjum handtók konuna og var hún í framhaldinu úrskurðuð í gæsluvarðhald. Hún sætir nú tilkynningaskyldu, segir í tilkynningu lögerglu.

Þá rannsakar lögreglan á Suðurnesjum nú mál rúmlega þrítugs karlmanns sem var með nær 300 töflur af oxycontin í fórum sínum við komuna hingað til lands. Tollgæsla hafði afskipti af honum og fann töflurnar. Maðurinn var að koma frá Gdansk í lok síðasta mánaðar og var hann handtekinn og fluttir í fangaklefa. Hann var látinn laus að skýrslutöku aflokinni.