„Ég hef ekki einu sinni nennt að horfa á þessi myndbönd!“ segir Guðmundur Ragnarsson, fyrrverandi formaður Félags vélstjóra og málmtæknimanna, um myndböndin sem Samherji hefur verið að birta undanfarnar vikur.
Í myndböndunum Samherja hefur verið rætt um Kastljóssþátt frá árinu 2012, fjölmiðlamanninn Helga Seljan, sem vann að umræddum þætti og minnisblað Verðlagsstofu skiptaverðs, er varðaði sölu á karfa árin 2008 og 2009, sem notuð notuð var í þætti Kastljóss. Samherji hefur ýmist haldið því fram að minnisblaðið hafi ekki verið til, því breytt, eða að Kastljós hafi valið sérstaka hluta úr því.
Eftir fyrsta myndbandið var Guðmundur Ragnarsson einn sá fyrsti sem staðfesti að gögnin sem Helgi Seljan og Kastljós hefði notað væru í raun og veru til. Nú hefur Verðlagsstofa einnig staðfest það og sent Samherja umrædd skjöl. Þrátt fyrir það hefur Samherji haldið áfram að birta myndbönd sín, en það nýjasta kom út í dag. Þar var því haldið fram að vinnubrögð Ríkisútvarpsins væru óheiðarleg.
Guðmundur segist ekki einu sinni nennt að horfa á þessi myndbönd Samherja, þrátt fyrir að hafa verið í bransanum í mörg ár.
„Ég hreinlega skil ekki hvað þeir eru að reyna með þessu, þetta er eiginlega bara barnalegt,“ segir Guðmundur og hlær.
Hann segist hreinlega ekki skilja þetta útspil Samherja og að það hafi komið sér verulega á óvart. Hann beri virðingu fyrir Samherja, en átti sig ekki á því hvað þeir séu að reyna með þessum myndböndum.
„Ég ber mikla virðingu fyrir þeim, mönnum eins og Þorsteini Má. Hann er gáfaður maður og það er ekkert að því að hrósa þeim fyrir það sem þeir gera vel. En ég bara skil þetta ekki. Og að fá eitthvað svaka lið til að gera þetta. Alveg ótrúlegt.“
Þá telur Guðmundur að þjóðin átti sig nokkuð vel á málinu og bendir á að eflaust hefði Verðlagsstofa ekki sent frá sér umrætt skjal, ef að ekki væri að marka það.
