Talsverð umræða hefur skapast um myndir af Þórdísi Kolbrúnu Reykfjörð Gylfadóttur sem birtust á samfélagsmiðlum í gær. Gærdeginum eyddi Þórdís með vinkonum sínum, fóru í heilsulind, verslunarleiðangur, dögurð og svo á veitingastað.

Ljóst er af myndunum að tveggja metra reglunni hefur eitthvað skolast til hjá vinkonunum en almennt virðist fólk gleyma sér helst til of oft. Jafnvel á blaðamannafundum Almannavarna líkt og sjá má hér að neðan.

Málið þykir sérstaklega pínlegt fyrir ráðherrann í ljósi nýfallinna orða Víðis Reynissonar hjá Ríkislögreglustjóra, um að rekja megi mörg hópsmitanna til „djamms“. Sagði Víðir á blaðamannafundi fyrir tveim dögum: „Við erum búin að sjá allt of mörg tilfelli í smitrakningunni þar sem eina sameiginlega tengingin aðila er einhvers konar djamm.“ Var jafnframt sagt að tilefni væri til þess að hafa áhyggjur af því að tveggja metra reglan gleymdist þegar áfengi væri um hönd.

Í vikunni voru jafnframt settar harðari reglur í kjölfar umræddra hópsmita og sögðu forystumenn ferðaþjónustunnar að með þeim væri „verið að jarða“ atvinnugreinina. Þórdís er sem kunnugt er ráðherra ferðamála.

Sjá nánar: Hlýða ekki Víði á djamminu – „Ekki öskursyngja upp í næsta mann.“

Þórdís birti eftirfarandi tilkynningu á Facebook síðu sinni í morgun, og segir það rangt að hún hafi verið „úti á lífinu,“ líkt og fullyrt var í frétt Fréttblaðsins um málið.

Ég átti langþráðan frídag með æskuvinkonum mínum sem mér þykir vænt um og dagurinn var nærandi. En dagurinn í dag síður og einfaldara hefði verið að ákveða að vera ekki með þeim.

Eftir sundferð okkar fjölskyldunnar í gær eins og aðra daga hitti ég vinkonur á veitingastað í hádeginu í gær sem passaði allar reglur en við sátum saman á borði eins og vinir gera sem borða saman. Starfsfólk var með grímur og tveggja metra regla tryggð gagnvart ótengdum aðilum á staðnum.

Við fórum í verslanir sem eru opnar og gengum niður Laugaveginn eins og fleiri gerðu á góðviðris degi.

Við borðuðum saman kvöldmat. Við fórum ekki út á lífið líkt og fullyrt hefur verið, það er rangt.

Það vakti jafnframt athygli á blaðamannafundi ríkisstjórnarinnar í vikunni, hve auðveldlega tveggja metra reglan virðist hafa gleymst um leið og ráðherrarnir töldu að slökkt hefði verið á myndavélunum. Fannst mörgum vont fordæmi sett, en í bakgrunni viðtals við Þórólf sáust haugur af fólki og enginn með grímur. Ein þeirra er Katrín Jakobsdóttir (sem stendur í hvarfi við Þórólf á mynd hér að neðan).