Guðmundur Gunnarsson, fyrrverandi bæjarstjóri Ísafjarðarbæjar starfaði á árum áður sem flugfreyja og þykir vont að sjá stéttina talaða niður með þeim hætti sem átt hefur sér stað síðustu daga.
„Sem fyrrverandi flugfreyja vil ég henda inn túkalli í umræðuna:
Flugfreyjur eru í raun slyngir öryggisverðir sem, með brosi og instantkaffi, fá þig til að gleyma því að þú ert á 900 kílómetra hraða í 12 kílómetra hæð. Í kremju. Inni í þunnu álröri. Með nælonbelti.“
Guðmundur segir flugfreyjur aðdáunarverðar. .
„Þau róa þig og hughreysta þegar þú ælir, fríkar út, drekkur of mikið, tapar kúlinu, grætur eða slefar í svefni. Kveðja þig svo með hlýju brosi.
Þau eru líka langlíklegust til að koma þér lifandi út úr álrörinu ef eitthvað fer úrskeiðis. Þau vita það en pirra sig samt aldrei á því að allir haldi að þau séu lítið annað en sætar gengilbeinur.“
Hann bendir á að flugfélögin geti ekki án flugþjóna verið og það sé ósmekklegt að sjá stéttina talaða niður.
„Þetta er ekki auðvelt djobb sem flugfélög geta verið án. Þetta er gríðarlega mikilvægur hlekkur í keðju sem beinlínis gengur út á þjónustu og öryggi.
Að tala stéttina niður lýsir taktleysi.“
