Á daglegum blaðamannafundi vegna COVID-19 var landlæknir, Alma D. Möller spurð hvers vegna dánartíðni vegna veirunnar hefði verið óvenju lítil á Íslandi, þá sérstaklega í samræmi við spár og önnur lönd.

Alma nefndi tvær höfuð ástæður, annar vegar að fólk færi fyrr inn á gjörgæslu á Íslandi en í mörgum öðrum löndum. Hins vegar sagði hún að lærdómur frá öðrum löndum, varðandi gjörgæsluviðbrögð, hefði skilað miklu.

„Auðvitað liggja skýringarnar ekki alveg fyrir, en mér finnst lang líklegast að fólkið sem við fáum inn á gjörgæslu sé ekki orðið eins veikt og til dæmis á Ítalíu, þar sem allt fór úr böndunum… Mér fannst þetta líkleg skýring en líka auðvitað að menn eru sífellt að læra hvernig meðferð er best að beita inn á gjörgæslu og ég veit að árangurinn hefur verið góður hérna á Íslandi miðað við mörg önnur lönd.“