Hópur veitingamanna hefur skrifað undir yfirlýsingu sem stíluð er á forsætisráðherra, fjármálaráðherra og dómsmálaráðherra. Þar er lýst yfir einlægum stuðningi við hugmyndir Áslaugar Örnu Sigurbjörnsdóttur dómsmálaráðherra um aukið frelsi í áfengisverslun og áform hennar um framlagningu lagafrumvarps þar sem netverslun með áfengi er heimiluð.
Tillagan er umdeild og hefur Áslaug Arna verið gagnrýnd harðlega fyrir hana.
Veitingamennirnir segja hins vegar að þessi lagabreyting gæti orðið einhverjum veitingahúsum sem annars færu á hausinn til bjargar. Þeir segja í yfirlýsingu sinni:
Við, undirritaðir veitingamenn stöndum eins og aðrir landsmenn frammi fyrir áður óþekktu ástandi. Líklegt má telja að margir innan okkar raða munu tapa sínum fyrirtækjum ef fer sem horfir. Flestir reyna þó að aðlaga sig breyttum aðstæðum, bjóða upp á heimsendingaþjónustu sem og heimtöku (take away) auk snertilausra viðskipta og svo mætti áfram telja. Framlegðin er ekki mikil en við viljum þjónusta okkar viðskiptavini hér eftir sem hingað til og freista þess að koma fyrirtækjum okkar í var sem og störfum þeim tengdum, meðan stormurinn gengur yfir.
Í dómsmálaráðuneytinu er tilbúið frumvarp um netverslun með áfengi sem enn hefur ekki verið leitt í lög. Við krefjumst þess af stjórnvöldum að frumvarpið verði sett í flýtimeðferð og það samþykkt með tilliti til þeirra aðstæðna sem uppi eru í samfélaginu. Sala léttvíns og bjórs samhliða veitingasölu á netinu gæti reynst sem lítill plástur á svöðusár veitingastaða um þessar mundir. Þótt aðgerðin sé minniháttar (og löngu timabær) gæti innleiðing laga um að heimila netverslun með áfengi skilið milli feigs og ófeigs hjá fjölda veitingamanna. Þar að auki myndi innleiðingin styrkja innlenda framleiðslu sem mun þá loks sitja við sama borð og erlendir keppinautar.
Einokun ríkisins í þessum málaflokki gengur að okkar mati gegn þeirri samfélagslegu ábyrgð sem yfirvöldum ber að sýna við núverandi aðstæður. Því er þess einnig óskað, til þrautavara, nái frumvarpið ekki fram að ganga, að sett verði bráðabirgðaákvæði líkt og nágrannalönd okkar og aðrir hafa þegar gert. Slíkt ákvæði myndi heimila vínveitingaleyfishöfum heimsendingu á áfengi með mat á meðan Covid-19 faraldurinn gengur yfir.
