Kristín Soffía Jónsdóttir, borgarfulltrúi Samfylkingarinnar, er harðlega gagnrýnd af mörgum fyrir orð sín á Twitter. Flestir sem gagnrýna hana eru af hægri væng íslenskra stjórnmála. Hún segir að þó enginn vilji efnahagshrun eða kulnun, þá sé nauðsynlegt að horfast í augu við að taumlaus vöxtur gangi ekki til lengri tíma vegna hamfarahlýnunar. Hún skrifar í gær:

„Kólnun hagkerfisins er áhyggjuefni en gleymum því samt ekki að minni framleiðsla, minni eyðsla, færri flugferðir og minni mengun er samt nákvæmlega það sem við stefnum að. Kalt hagkerfi – köld pláneta. Þurfum að vinna með þessa kólnun – ekki gegn henni.“

Sjálfstæðismaðurinn Friðjón Friðjónsson er fyrstur til að gagnrýna hana en hann skrifar: „Framtíðin hjá Samfylkingu, aukið atvinnuleysi, verra velferðarkerfi, minni kaupmáttur fjölskyldna, heimskt og heimaalið fólk.“

Sveinn Friðrik Sveinsson, fjármálastjóri Samtaka fyrirtækja í sjávarútvegi, tekur undir. „Kalt hagkerfi -> köld heilbrigðis- og menntakerfi -> verri lífskjör þjóðarinnar. Nöturleg sýn,“ skrifar hann. Þessu svarar Kristín Soffía: „Satt mjög nöturleg. En hlýnun jarðar, þótt hún hljómi betur er ekki síður nöturleg. Verðum að dempa þessa niðursveiflu en markmiðið getur ekki verið að ná öllu upp í sama swing glóbalí. Þá geta þessir þjóðarleiðtogar bara hætt að hittast.“

Konráð S. Guðjónsson, hagfræðingur Viðskiptaráðs, skýtur líka á hana. „Ok, þú ert þá væntanlega í samræmi við það til í mörg prósenta lækkun kaupmátts og launa almennings og mun minna úr að spila fyrir ríki og sveitarfélög?,“ spyr hann og þá svarar Kristín Soffía:

„Nei ég er ekki til í neitt af þessu og er með margfaldan heimsendakvíða. En nú þegar það sést til himins í Kína þá verðum við að þora að spyrja okkur hvort leiðin áfram sé endilega leiðin til baka. Er neysludrifið hagkerfi eina svarið og hamfarahlýnun óumflýjanleg?“

Konráð tekur þessu ekki illa. „Gott mál, en það hljómaði svolítið eins og þú værir til. Nei að sjálfsögðu ekki. En ef leiðin er einungis sú að draga almennt úr neyslu, gera ferðalög dýrari osfrv er óhjákvæmilegt að kaupmáttur minnkar osfrv. Mér hugnast betur nýir orkugjafar og skynsamlegri neysla.

Auglýsingamaðurinn Þorvaldur Sverrisson virðist ekki ósammála en telur orð hennar taktlaus. „Það væri samt frekar gott ef við værum ekki að fagna gjaldþroti hálfrar þjóðarinnar í beinni útsendingu.“ Því svarar Kristín Soffía: „Róa sig. Er ekki að óska eftir gjaldþroti neins né á þetta eitthvað sérílagi við un Ísland. En ástandið setur fókus á að neyslusrifið hagkerfi er aldrei að fara að draga úr losun. Þetta er alheimsvandamál.“

Kólnun hagkerfisins er áhyggjuefni en gleymum því samt ekki að minni framleiðsla, minni eyðsla, færri flugferðir og minni mengun er samt nákvæmlega það sem við stefnum að. Kalt hagkerfi – köld pláneta. Þurfum að vinna með þessa kólnun – ekki gegn henni.

— Kristín Soffía (@KristinSoffia) March 10, 2020