Víðir Reynisson, yfirlögregluþjónn hjá embætti Ríkislögreglustjóra, hefur staðfest það í samtali við fréttastofu Vísis að innanlandssmit COVID-19 veirunnar séu orðin fjögur talsins á Íslandi. Þá eru staðfest smittilfelli orðin 44 talsins.

Neyðarstigi almannavarna var lýst yfir fyrr í dag en Víðir sagði þó að það komi ekki til með að hafa áhrif á almenning hérlendis. Neyðarstigið er meira fyrir um 200 stofnanir og fyrirtæki sem eiga að herða skipulag.

Þá segir Víðir að það hljóti að fara að „styttast í þann tímapunkt“ að samkomubann verði sett á en þó er ekki búið að taka neina ákvörðun um það.

Uppfært klukkan 19:30: Í fyrstu útgáfu fréttarinnar stóð að innanlandssmitin væru þrjú en þau eru nú orðin fjögur talsins.