Afstaða, félag fanga og annarra áhugamanna um bætt fangelsismál og betrun, hefur sent frá sér tilkynningu um viðbúnaðarstig í fangelsum landsins vegna COVID-19 veirunnar. Eftir að neyðaststigi var lýst yfir í dag í kjölfar fyrstu innanlandssmitanna hafa skilyrði í þágu heftunar útbreiðslu veirunnar í fangelsum verið hert. Eru heimsóknir til fanga nú bannaðar.
Afstaða hvetur yfir yfirvegunar, þolinmæði og umfram allt hreinlætis á þessum tímum Kórónuveirunar en tilkynningin er eftirfarandi:
Tilkynning til fanga og aðstandenda
Þar sem almannavarnir hafa lýst yfir neyðarstigi vegna COVID-19 veirunnar hefur það í för með sér að fangelsi landsins eru á sett á sama stig. Þetta mun þegar í stað hafa töluverð áhrif á skjólstæðinga Fangelsismálastofnunar, þ.e. vistmenn í fangelsum hér á landi.
Hafa ber í huga að þessi áætlun er endurskoðuð daglega og er eingöngu með hagsmuni fanga, fangavarða og þeirra starfsmanna sem koma að fangelsunum.
Eins og staðan er núna þá eru:
1. Heimsóknir í fangelsin ekki leyfðar.
2. Engir flutningar verða á milli fangelsa.
3. Leyfi úr fangelsum verða ekki veitt að svo stöddu.
4. Öllum fundum hagsmunasamtaka er frestað, þar með talið Afstöðu og AA-samtakanna.
Afstaða fundar með Fangelsismálastofnun daglega og sambandið þar á milli er stöðugt á meðan þessum þrengingum og takmörkunum stendur. Eftir því sem málum vindur fram getur þurft að þrengja eða létta á takmörkunum.
Eins og áður biður Afstaða alla að taka fréttum sem þessum af yfirvegun og ró. Fyrst og fremst þurfa allir að hugsa um hreinlæti og að fylgja fyrirmælum sóttvarnalæknis.
Afstaða hvetur til þess að allir sýni þolinmæði á þessum mjög krefjandi tímum í fangelsum landsins. Öllum til heilla.
