„Það er ekki dónaskapur við sitjandi forseta að bjóða sig fram, þvert á móti; það er dónaskapur að gefa manninum ekki kost á að reyna að ná meirihluta kjósenda.“

Þetta segir Gunnar Smári Egilsson, stofnandi Sósíalistaflokksins, í færslu á Facebook-síðu sinni.

Guðni Th. Jóhannesson, forseti Íslands, tilkynnti í nýársávarpi sínu í gær að hann hygðist gefa kost á sér í embættið að nýju. Guðni var kjörinn forseti árið 2016. Ef Guðni fær mótframboð í embættið verða forsetakosningar haldnar þann 27. júní næstkomandi. Ef Guðni fær ekki mótframboð verður hann settur í embættið án kosninga.

„Nú þegar Guðni Th. hefur lýst yfir framboði vona ég, sem hugheill áhugamaður um kosningar, að einhver láti sig hafa það og bjóði sig fram á móti honum. Það væri gaman að fá alþýðukona að vestan, einstæða atvinnulausa fiskverkakonu, fórnarlamb kvótakerfisins, eða héraðshöfðingja að norðan, sem lofar að flytja embættið frá Bessastöðum að Hólum. Það væri gaman að fá kosningar með stéttar- eða landshlutavinkli,“ segir Gunnar Smári sem útskýrir þessa afstöðu sína í umræðum undir þræðinum.

„Ég er að biðja um fólk í æðstu embætti sem þekkir af reynslu líf fólksins í landinu, þess sem er fast í basli og striti. Það er nóg af fólki sem hefur skoðanir á þessu, það vantar reynsluna ef við ætlum að breyta einhverju,“ segir hann og bætir við:

„Guðni hefur mikið mennta- og félagslegt kapítal og hefur því meira vald en þau sem ekki eiga slíkt, eru án menntakapítals, félagslegs kapítals og peningalegs kapítals.“