Lögreglan á höfuðborgarsvæðinu var kölluð út klukkan rúmlega ellefu í gærkvöldi vegna hóps manna sem greindi á í austurbænum. Í skeyti frá lögreglu kemur fram að einn úr hópnum hafi dregið fram hníf þegar leið á deilurnar. Lögregla lagði hald á hnífinn og bíður maðurinn nú ákvörðunar ákærusviðs um framhald málsins. Frekari upplýsingar um málið koma ekki fram í dagbók lögreglu.

Lögregla handtók svo mann rétt fyrir klukkan tvö í nótt vegna gruns um líkamsárás í miðborginni. Að sögn lögreglu var viðkomandi undir talsverðum áhrifum fíkniefna og fékk hann að gista fangageymslur. Hann verður yfirheyrður í dag.

Þá hafði lögregla afskipti af tveimur ökumönnum sem grunaðir eru um akstur undir áhrifum fíkniefna. Annar var stöðvaður í Hafnarfirði en sá hinn sami hafði ekki ökuskírteini sitt undir höndum þegar lögregla stöðvaði hann. Sömu sögu er að segja af hinum en sá reyndist vera sviptur ökuréttindum.

Að öðru leyti var nóttin tiltölulega róleg hjá lögreglu en alls eru um tuttugu mál skráð í málaskrá hennar.