Prentmet Oddi þarf nú að grípa til sársaukafullra hagræðingaðgerða og hefur 19 manns Odda-megin í fyrirtækinu verið sagt upp. Er það einn þriðji af starfsmönnum prentiðjuhlutans en nýir eigendur tóku við prentsmiðjunni fyrir skömmu og heitir fyrirtækið núna Prentmet Oddi.

„Við erum nýir eigendur og höfum verið að hagræða undanfarna mánuði. Því miður eru þetta nauðsynlegar hagræðingaraðgerðir. Samúð mín er hjá starfsmönnum á þessum erfiðu tímum,“ segir Guðmundur Ragnar Guðmundsson, framkvæmdastjóri Prentmets Odda. Guðmundur er annar af stofnendum Prentmets sem keypti prentsmiðjuna Odda fyrir skömmu.

„Við vorum í þeim sporum að þurfa að kaupa þennan rekstur eða láta hann fara. Ég lærði þarna á sínum tíma og það var af ástríðu fyrir faginu sem ég vildi bjarga því sem hægt var að bjarga. Það er þá tveir þriðju af starfsfólki prentsmiðjunnar sem heldur störfum. Það hefur bara verið mjög slæmur rekstur á Odda undanfarin ár og gríðarlegt tap. Við erum hins vegar að reyna að búa til rekstrarhæft félag.“

Guðmundur segist líta björtum augum til framtíðarinnar eftir þessar nauðsynlegu en sársaukafullu hagræðingaraðgerðir.