Langflestir dæmdir, íslenskri barnaníðingar sem búa á höfuðborgarsvæðinu eru til heimilis í Reykjavík, eða tæplega sjötíu prósent. Tæplega sautján prósent búa í Kópavogi en rúm átta prósent í Mosfellsbæ og Hafnarfirði. Enginn barnaníðingur á höfuðborgarsvæðinu er búsettur á Seltjarnarnesi eða í Garðabæ.
Þetta er meðal þess sem kemur fram í nýjasta helgarblaði DV þar sem seinni hluti korts yfir barnaníðinga er birtur. Allir barnaníðingar sem DV hefur birt á þessum tveimur kortum hafa allir verið sakfelldir fyrir héraðsdómi og dæmdir til fangelsisvistar. Vert er að taka fram að við vinnslu greinarinnar var meðal annars notast við upplýsingar úr Þjóðskrá sem og staðfestar heimildir. Í sumum tilfellum er stuðst við seinasta skráða heimilisfang viðkomandi.
Sjá einnig: Hér búa barnaníðingarnir – DV birtir kort
Í umfjöllunum DV hefur þeirri spurningu verið velt upp hvort upplýsingar um aðsetur dæmdra barnaníðinga ætti að vera aðgengilegt almenningi í einhverju formi. Einnig hefur verið bent á að dæmdir barnaníðingar ganga um algjörlega eftirlitslausir eftir afplánun, þó að vitað sé að ákveðið hlutfall af þeim brjóti af sér aftur og eru þeir því hættulegir samfélaginu.
Helgi Gunnlaugsson, afbrotafræðingur, telur ekki heppilegt ef upplýsingar um aðsetur barnaníðinga séu gerðar opinberar eða aðgengilegar.
„Það er hætt á að þetta leiði til aukinnar brennimerkingar og útskúfunar úr samfélaginu og þessir einstaklingar verði hættulegri fyrir vikið,“ sagði hann í viðtali við Morgunblaðið árið 2017.
Eftirlitsleysi kerfisins gerir það hins vegar að verkum að dæmdir barnaníðingar geta haft aðsetur í námunda við börn. Einnig er þeim frjálst að skipta um nafn, eins og margir af þeim barnaníðingum sem DV hefur birt á þessum tveimur kortum, hafa gert.
Eins og fram hefur komið í DV búa flestir dæmdir barnaníðingar á höfuðborgarsvæðinu, eða 32,5 prósent. Af þeim hafa langflestir aðsetur í Reykjavík, eða tæplega sjötíu prósent. Hér fyrir neðan eru nokkrir af þeim barnaníðingum sem búsettir eru í Reykjavík, en áður hefur DV birt nokkra til viðbótar á höfuðborgarsvæðinu:
Fjöldi brotaþola (sem vitað er um): 1
Stefán Reynir Heimisson hlaut árið 2013 sjö ára fangelsisdóm í Héraðsdómi Reykjavíkur fyrir að nema 10 ára stúlku á brott og brjóta á henni kynferðislega. Stúlkan var á leið heim úr skóla þegar Stefán Reynir nálgaðist hana. Laug hann að henni að hann væri lögreglumaður og að hann ætlaði að fara með hana upp á lögreglustöð. Því næst keyrði hann með stúlkuna frá vesturbæ Reykjavíkur upp í Heiðmörk þar sem hann braut á henni kynferðislega og tók myndband og ljósmyndir af athæfinu á farsíma sinn.
Hæstiréttur þyngdi síðar meir refsinguna í 10 ára fangelsi. Um er að ræða einn af þyngstu dómum sem fallið hafa á Íslandi vegna kynferðisbrots. Í dómsúrskurði segir að Stefán Reynir eigi sér engar málsbætur og að brotaviljinn hafi verið styrkur og einbeittur. Stefán Reynir er í dag skráður undir nafninu Haukur Heimisson í Þjóðskrá.
Fjöldi brotaþola (sem vitað er um): 1
Árið 2014 var Böðvar Guðmundsson, betur þekktur sem Bleyju-Böðvar, dæmdur fyrir kynferðislega áreitni á hendur 14 ára dreng auk þess sem yfir 500 myndir af börnum í kynferðislegum stellingum fundust í tölvu hans og farsíma. Í þeim dómi kemur fram að hann sé sérstaklega líklegur til að brjóta aftur af sér. Þar kom einnig fram að Böðvar sé greindur með ódæmigerða einhverfu og hafi sýnt afbrigðilega kynferðishegðun frá unga aldri, auk þess sem hann er sagður talinn í „hárri áhættu“ fyrir frekari kynferðislega hegðun gegn börnum.
Fjöldi brotaþola (sem vitað er um): 2
Daði Freyr Kristjánsson var dæmdur í þriggja ára fangelsi þann 8. maí árið 2014 fyrir að nema tvær sjö ára stúlkur á brott í bíl sínum, keyra með þær á afvikinn stað, þar sem hann kyssti þær og þuklaði á þeim. Brot Daða Freys áttu sér stað 9. janúar árið 2013 en hann hafði verið, ásamt stúlkunum tveimur, í Krónunni við Rofabæ. Stúlkurnar höfðu verið að hnupla sælgæti í versluninni og Daði sá til þeirra. Þegar út var komið nýtti hann sér það og lagði bifreið sinni við strætóbiðskýli þar sem stúlkurnar stóðu skömmu síðar. Sagðist Daði hafa séð til þeirra og skipaði þeim að setjast upp í bílinn ellegar myndi hann hringja á lögregluna.
Í dómnum segir að hann hafi kysst aðra stúlkuna á kinnina og snert maga og læri þeirra beggja utan klæða. Þegar þær fóru að gráta fór Daði með þær aftur þangað sem hann hafði þvingað þær upp í bílinn og skildi þær eftir. Daði gaf sig síðan sjálfviljugur fram við lögreglu eftir að lýst hafði verið eftir honum.
Daði Freyr fékk þriggja ára fangelsisdóm í héraði sem Hæstiréttur Íslands staðfesti síðan. Hann lauk afplánun árið 2017. Hann er í dag skráður til heimilis í Grafarholti. Hann heitir í dag Eldjárn Freyr Kristjánsson.
Ekki missa af nýjasta helgarblaði DV.
