Pólsk yfirvöld hafa afturkallað framsalskröfu á hendur pólskum manni, búsettum hér á landi, og fellt niður alþjóðlega handtökuskipun á hendur honum. Fyrst var óskað eftir framsali mannsins í desember 2017 en þá sat hann í gæsluvarðhaldi hér á landi í tengslum við rannsókn á skipulagðri brotastarfsemi, svokallað Euro-Market mál. Málið hefur nú velkst um í kerfinu í eitt og hálft ár.

Fréttablaðið skýrir frá þessu í dag. Þegar málið var til rannsóknar kom fram að það tengdist fíkniefnainnflutningi, peningaþvætt, fjársvikum, brotum á vopnalögum, lyfjalögum og fíkniefnaframleiðslu.

Héraðsdómur hafnaði framsalskröfu á sínum tíma þar sem ekki væri heimilt að framselja fólk sem er í gæsluvarðhaldi eða farbanni vegna rannsóknar annars máls en þess sem framsalsbeiðnin byggir á. Landsréttur staðfesti þetta. Maðurinn var síðar úrskurðaður í farbann með vísan til framsalskröfunnar. Síðan var framsalið heimilað með dómsúrskurði.

Haft er eftir Steinbergi Finnbogasyni, verjanda mannsins,  að maðurinn hafi nú fengið svokallað griðabréf frá pólskum yfirvöldum. Í því felist að hann geti farið til Póllands til að gefa skýrslu og svo komið aftur til Íslands ef hann kýs svo. Hann sagði að maðurinn hafi þurft að greiða tryggingu og lofa því að mæta til skýrslutöku í Póllandi.