Bjarni Benediktsson, fjármála- og efnahagsráðherra, kynnti í gær áform ríkisstjórnarinnar um skattabreytingar. Tekjuskattsþrepin verða þrjú, skattleysismörk tæplega 160.000 kr. á mánuði og tekjuskattur á lágtekjufólk verður lækkaður um 2% . Ráðstöfunartekjur láglaunafólks aukast um 80 þúsund krónur á ári við breytinguna, eða tæplega 7000 krónur á mánuði, en sú upphæð hefur víða verið gagnrýnd og þá helst fyrir að vera ekki nægjanlega há.

Þá var Bjarni einnig gagnrýndur af Sigmundi Davíð Gunnlaugssyni formanni Miðflokksins, í gær, er hann benti á að Bjarni hefði í gegnum árin ávallt talað gegn þriggja þrepa skattkerfi og því væri aðgerð ríkisstjórnarinnar í bullandi mótsögn við vilja Bjarna og Sjálfstæðisflokksins þar af leiðandi.

Sjá nánar: Sjáðu hvað Bjarni Ben hefur áður sagt um þriggja þrepa skattkerfi

Kakan í rökréttu hlutfalli

Ef marka má Facebookfærslu konu sem bauð sig fram í 6. sætið í prófkjöri Sjálfstæðisflokksins í Suðvesturkjördæmi árið 2012, getur gagnrýni einnig verið gómsæt:

„Hey Bjarni! Takk fyrir þessa frábæru tillögu um skattalækkanir fyrir lægsta tekjuhópinn. Ég bakaði þessa fínu köku handa þér sem ég tel í rökréttu hlutfalli við þið hversu stórkostleg áhrif þetta mun hafa á líf þeirra sem lifa af þessum lægstu tekjum. Nú verður partý! Vonandi skildirðu eftir pláss fyrir desertinn og þú gefur kannski með þér. Ekki torgarðu þessum helling einn.“

Myndin sem hún birtir er af agnarsmárri súkkulaðiköku, en Bjarni er einmitt þekktur fyrir kökubakstur sinn, ekki síst í aðdraganda kosninga.