Ýmislegt bendir til að inflúensan, sem herjar oft á landsmenn á þessum árstíma, gæti orðið vægari en á undanförnum árum. Ástæður þess eru meðal annars að bóluefnið gegn henni, sem fékkst til landsins í haust, virðist vera gott og fleiri mættu í bólusetningu en oft áður eða um 68.000 manns.

Þetta er haft eftir Óskari Reykdalssyni, lækni og settum forstjóra Heilsugæslu höfuðborgarsvæðisins, í Morgunblaðinu í dag.

Fram kemur að inflúensan byrji oft að láta á sér kræla í nóvember og nái hámarki í febrúar og mars. Það er hægt að skipta henni í nokkra flokka en einkennin eru yfirleitt þau sömu. Fólk veikist snögglega, fær háan hita og höfuð- og beinverki.