Kolbrún Bergþórsdóttir, leiðarahöfundur Fréttablaðsins, skrifar býsna athyglisverðan leiðara í blaði dagsins um reiða fólkið á Íslandi. Kolbrún segir að á Íslandi séu margir sem þrífast á reiði, þeir vakni einbeittir á hverjum morgni og tilbúnir í slag dagsins.
„Alkunna er að það hefur ekki góð áhrif á fólk að reiðast svo mjög að það helli úr skálum reiði sinnar. Þegar þetta hendir fólk sem venjulega er fremur gefið fyrir rólegheit þá verður það hálf dasað á eftir og jafnvel skömmustulegt. Það hefur á tilfinningunni að það hafi gert sig að fífli og skilur ekki sjálft hvernig það asnaðist til að láta neikvæða orku ná slíkum ofurtökum á sér. Viðkomandi heitir sjálfum sér því að endurtaka leikinn ekki í bráð.“
Kolbrún segir að þetta eigi ekki við um alla „því í íslensku samfélagi eru fjölmargir sem þrífast á reiði“, segir Kolbrún og bætir við að þeir vakni tilbúnir dag hvern.
„Þeir vita að það er ansi margt sem ástæða er til að æsa sig yfir og þeir ætla sannarlega ekki að missa af tækifæri til þess. Eitt af fyrstu verkefnum þeirra er því að kanna hvort einhver hafi ekki örugglega sagt eða gert einhverja vitleysu sem hægt sé að skammast yfir á netinu. Stundum liggur ekki alveg ljóst fyrir að svo sé, en þá er fylgt hinni klassísku ráðleggingu: Leitið og þér munuð finna. Afli dagsins er yfirleitt góður.“
Kolbrún segir að margir þeirra sem virða skoðanir sínar eigi það til að koma hlutunum klaufalega frá sér, nota jafnvel ónákvæm eða klaufaleg orð og þá séu hártoganir frá reiða fólkinu sjaldan langt undan. Reiða fólkið beiti hártogunum og útúrsnúningum sem verði til þess að sá sem lýsti skoðun sinni á klaufalegan hátt neyðist til að biðjast afsökunar.
„Það gerir alltaf lukku hjá reiða fólkinu þegar einhver verður verulega aumur og stynur upp afsökunarorðum sem sýna að hann þráir að vera í náðinni. Nútímatækni er líka svo sniðug að það má hella svívirðingum yfir einstakling án þess að þurfa að standa frammi fyrir viðkomandi, sem gerir það enn auðveldara að gera lítið úr honum og opinbera fyrir öðrum að hann sé algjör asni og skoðanir hans ömurlegar.“
Kolbrún segir að reiða fólkið sem hefur ríka þörf til að tjá sig á netinu á neikvæðan hátt hafi einstaka hæfileika til að láta hluti fara í taugarnar á sér.
„Einhverjir með rólyndari lund myndu sannarlega ráðleggja þeim að leiða hluti hjá sér, því ekki væri ástæða til að æsa sig yfir hverju sem er og svo sé alls ekki nauðsynlegt að hafa sterkar skoðanir á öllum mögulegum hlutum. Svoleiðis rök bíta ekki á reiða fólkið. Reiði þess er yfirleitt með áberandi sterkum geðvonskublæ, því er stöðugt misboðið, jafnt í stóru sem smáu. Það fyllist heilagri vandlætingu nánast út af hverju sem er.
Reiða fólkið er á meðal okkar. Það hefur gríðarlegt úthald og hefur auk þess unun af að dekra við reiði sína. Þannig líður því einfaldlega best.“
