Ungmennafélag Grundarfjarðar, UMFG, hefur kært fyrrverandi gjaldkera félagsins fyrir fjárdrátt. Um er að ræða mann sem sat í stjórn félagsins um árabil.

Vísir greinir frá þessu og segir að Héraðssaksóknari hafi málið til rannsóknar. Ragnar Smári Guðmundsson, formaður UMFG, vildi ekkert tjá sig um málið í samtali við DV. Aðrir stjórnarmenn sem ræddu við DV vildu heldur ekki tjá sig um málið. Ekki náðist í gjaldkerann við vinnslu fréttarinnar.

Heimildir DV herma að meintur fjárdráttur telji milljónum króna og málið hafi komist upp síðasta sumar. Málið kom inn á borð Héraðssaksóknara í vor, Ólafur Þór Hauksson saksóknari staðfesti það en vildi ekki staðfesta meinta upphæð. Samkvæmt heimildum RÚV er gjaldkerinn fyrrverandi grunaður um að hafa dregið að sér rúmar tíu milljónir króna.