Davíð Oddsson styrkti Sævar Ciesielski þegar Sævar glímdi við fjárhagserfiðleika á tíunda áratug síðustu aldar, þetta staðfesti Davíð í samtali við Vísi í dag.

Sigurfreyr Jónasson, sem vann með Sævari að endurupptöku Guðmundar- og Geirfinnsmála, upplýsti þetta í athugasemd við grein Jóns Steinars Gunnlaugssonar, sem var svar við grein Hafþórs Sævarssonar, sonar Sævars. Sigurfreyr, sem hafði ekki áhuga á að ræða málið í samtali við DV, segir í athugasemdinni að Davíð hafi reynt af bestu getu að rétta hlut Sævars.

Sævar hafi orðið stórskuldugur vegna málsins og hafi því gengið á fund Davíðs, sem þá var forsætisráðherra, Davíð hafi hlustað á Sævar af miklum skilningi og gefið honum „væna fjárhæð“ til að halda baráttunni áfram. Davíð, sem talaði um að framin hefðu verið dómsmorð í málinu, vildi ekki segja hversu há fjárhæðin var:

„Þess utan var það svo að þegar að Sævar bjó með konu á Stúdentagörðum, nærri heimili mínu á Lynghaga 5, bankaði hann oft upp á að kvöldi til og fékk kaffisopa og fór yfir sín mál. Einhvern tíma síðar mun ég kannski fjalla um þau mál og fleiri,“ sagði Davíð í svari við fyrirspurn Vísis.