Fimmtíu manns, hópur sjálfboðaliða gekk og hreinsaði fjörur eyðibyggðanna í Fjörðum norðan Grenivíkur á Sjómannadaginn síðastliðinn. Þyrluskíðafyrirtækið Arctic Heli Skiing skipulagði þennan viðburð í samvinnu við fjölda fyrirtækja og félagasamtaka við Eyjafjörð. Fjörður í Grýtubakkahreppi eru ein mesta náttúrperla landsins en þar kemst enginn um nema fuglinn fljúgandi á þessum árstíma nema þá af sjó.
Hvalaskoðunarfyrirtækið Arctic Sea Tours á Dalvík sigldi með um 40 sjálfboðaliða frá Grenivík í Keflavík, Þorgeirs- og Hvalvatnsfjörð þar sem Björgunarsveitin Ægir flutti fólk í land. Þyrla Norðurflugs flaug svo með 10 manna hóp í Kjálkanes á Látraströnd.

Jökull Bergmann, eigandi Arctic Heli Skiing, segir hreinsunarstörf hafa gengið vel. Segir hann að í lok dags hafi verið slegið upp grillveislu í hvalaskoðunarbátnum Mána sem styrkt var af Kjarnafæði og Kontornum á Grenivík en þar fékk þreyttur en glaður mannskapurinn í gogginn áður en siglt var aftur til byggða.

„Öllu rusli var safnað í stórsekki sem síðan voru hífðir til byggða af þyrlunni. Mikið rusl hefur safnast saman í fjörum á svæðinu undanfarin ár eins og í flestum fjörum landsins. Með þyrlunni fékkst einnig nákvæm tala á þyngd ruslsins sem vó tvö og hálft tonn og var mikið umfangs.“