Bíll sem stolið var af Nicolai Þorsteinssyn í gær með þeirra aðferð að par kom að skoða bílinn eftir að hafa séð hann auglýstan til sölu en ók síðan burtu á bílnum er nú fundinn. Fannst hann upp í Heiðmörk í gærkvöld og hafði ökumaðurinn fest hann í skafli. Bíllinn virðist óskemmdur.

Við greindum frá því í frétt í gærkvöld að par (fólkið er líklega á fertugsaldri) kom að skoða bíl til sölu hjá Nicolai Þorsteinssyni í Seljahverfinu síðdegis í gær. Fólkið bað um að fá að skjótast á bílnum upp í Grafarholt en sást ekki eftir það og svaraði ekki í síma. Nicolai tilkynnti málið til lögreglu en hann hafði bæði góða lýsingu á fólkinu og hafði fengið að sjá persónuskilríki konunnar. Lögreglan kannaðist við fólkið en það er talið hafa stundað þessa iðju um nokkurt skeið í því skyni að finna sér svefnstað um nætur en þau eru húsnæðislaus.

Í samtali við dv.is í dag sagði Nicolai að maður hefði haft samband við sig í gærkvöld og tjáð sér að parið hafi reynt að leika sama leik við sig, vildi fá að skjótast á bílnum sem hann hafði til sölu, en sá maður vísaði þeim frá. Þykir líklegt að þetta hafi gerst eftir að parið festi bílinn í Heiðmörk í gær.
Fólkið var handtekið í gærkvöld.