„Nei, ég ætla bara að bíða með að velta því mikið fyrir mér,“ segir Árni Páll Árnason, formaður Samfylkingarinnar, aðspurður hvort hann hafi tekið ákvörðun um hvort hann bjóði sig fram til formennsku á ný á landsfundi flokksins í júní næstkomandi. Framkvæmdastjórn Samfylkingarinnar ákvað að flýta landsfundinum í síðasta mánuði.

„Við erum á fullu núna í samtali innan flokks í framhaldi bréfsins sem ég sendi. Það eru fundir úti um allt land sem ganga mjög vel. Ég ætla að einbeita mér að því næstu vikur,“ bætir hann við í samtali við DV. Bréfið sem hann vísar til sendi hann á flokksfélaga sína, í kjölfar ákvörðunar framkvæmdastjórnarinnar um að flýta landsfundi, þar sem hann kallaði eftir uppgjöri flokksins við mistök sín á umliðnum árum.

Fylgi Samfylkingarinnar hefur hríðfallið á undanförnum misserum og mældist aðeins 9,7 prósent í könnun Gallup þann 29. febrúar síðastliðinn. Árni vill þó ekki meina að hann liggi sérstaklega undir feldi varðandi framhaldið. „Ég er bara úti um allar trissur og ekkert að hugsa um þetta. Ég geri það bara seinna.“