Hótelstarfsmaður kom upp um íslenska parið sem handtekið var í Brasilíu á milli jól og nýárs. Frá þessu greina fjölmiðlar í Brasilíu en nokkuð hefur verið fjallað um málið í þarlendum miðlum.

Eins greint hefur verið frá er íslenskt par, tvítug kona og 26 ára karlmaður, í gæsluvarðhaldi í Fortaleza í Brasilíu en það var gripið með fjögur kíló af kókaíni.

Samkvæmt brasilískum fjölmiðlum var það hótelstarfsmaður, á hótelinu þar sem parið gisti, sem gerði lögreglu viðvart þegar parið var að yfirgefa hótelið. Fram kemur að leigubílstjóri, sem ók parinu frá hótelinu, hafi staðfest þá frásögn.

Fjölmiðlar í Brasilíu segja að sex lögreglumenn hafi tekið þátt í handtökunni á parinu. Frá þessu var greint á mbl í morgun en þar kemur meðal annars fram að parið sé nú komið með túlk sér til aðstoðar.

Eins og fram hefur komið í fjölmiðlum gæti parið fengið allt að 15 ára fangelsisdóm fyrir smyglið. Parið var handtekið á Motel Paradis. Í töskum þeirra voru falskir botnar sem kókaínið var geymt í, auk þess sem fíkniefni fundust í smokkum.

Sjá einnig: Íslenska parið gæti fengið 5-15 ára fangelsi: Faðir mannsins heyrði fyrst af handtökunum í fjölmiðlum