Sérsveit Alríkislögreglu Bandaríkjanna (FBI) braust inn í höfðingjasetur áhrifavaldsins og YouTube-stjörnunnar umdeildu Jake Paul í gær, til að gera húsleit. Umrætt húsnæði er í Calabasas-borg, í Kalíforníu-fylki Bandaríkjunum. Los Angeles Times greinir frá þessu.
Í fyrstu var mikil óvissa í loftinu yfir því hvers vegna húsleitin átti sér stað, en FBI hefur gefið út yfirlýsingu vegna málsins. Þar segir að húsleitin hafi átt sér stað vegna atviks í verslunarmiðstöð í Arizona, í maí sem tengdist Black Lives Matter-mótmælunum.
Jake Paul á ekki að hafa verið viðstaddur húsleitina, heldur í öðru fylki. Hann hefur verið vinsæl YouTube-stjarna um árabil, en oft komist á milli tannana á fólki. Þá hefur hann lagt stund á hnefaleika og stendur bardagi á milli hans og NBA-stjörnunnar Nate Robinson til. Bróðir hans, Logan Paul er einnig gríðarlega vinsæll á YouTube, en hann er ef eitthvað er umdeildari en Jake.
Sveitin sem að FBI sendi í húsleitina á að vera sérstaklega þjálfuð til að takast á við erfiðar aðstæður, líkt og ofbeldi. Mynband af vettvangi sýnir sveitina ganga úr húsinu með skotvopn sem fundust í húsinu.
Hér að neðan má sjá myndband af vettvangi, þegar að FBI yfirgaf svæðið.
