Fyrrverandi Disney-stjarnan og leikkonan Bella Thorne tilkynnti komu sína á OnlyFans.com með myndbandi á Instagram. Bella Thorne er 22 ára og lék í mörgum Disney myndum og þáttum á árum áður. Í fyrra prófaði hún sig áfram í leikstjórn og leikstýrði klámmynd fyrir PornHub.
Nú hefur Bella Thorne ákveðið að stofna OnlyFans-síðu. OnlyFans er miðill sem gerir notendum kleift að selja efni sitt til áskrifenda gegn mánaðarlegu gjaldi. Klámstjörnur eru vinsælar á miðlinum en einnig áhrifavaldar sem selja djarfar myndir af sér. Aðdáendur geta einnig sent notendum skilaboð og lagt fram beiðni um myndefni gegn gjaldi.
Sjá einnig: Furðulegasta beiðnin sem íslensk kona hefur fengið á OnlyFans: „Ég myndi aldrei gera það“
Bella deildi myndbandi á Instagram og tilkynnti um komu sína á miðillinn. Það er óvíst hvers konar efni Bella mun koma til með að deila með aðdáendum sínum. En í viðtali við Paper segist hún vera spennt fyrir að geta stjórnað ímyndinni sinni án þess að vera ritskoðuð.
Mánaðaráskrift hjá Bellu kostar 2700 krónur og býst Bella við mikilli athygli. Samkvæmt Paper er þegar búið að áætla að tekjur hennar af OnlyFans verði rúmlega 138 milljón krónur.
