Leikstjóri vinsæla kvikmynda þríleiksins The Matrix, Lilly Wachowski, hefur staðfest að kjarni sögunnar sem er sögð í myndunum sé um það að vera trans einstaklingur.

Lilly leikstýrði myndunum með systur sinni, Lönu. Báðar eru þær trans konur, en voru ekki búnar að greina frá því opinberlega þegar myndirnar voru framleiddar.

Fyrsta Matrix myndin kom út árið 1999. Eftir að systurnar stigu fram sem trans konur, Lana árið 2010 og Lilly árið 2016,  hefur orðrómur gengið þess efnis að leikstjórar myndanna hafi ætlað þeim að vera myndlíking fyrir það hvernig það er að vera trans einstaklingur.. En nú er orðrómurinn staðfestur eftir viðtal sem Lilly veitti Netflix.

„Ég er svo ánægð að fólk er að velta fyrir sér myndunum, Matrix-myndunum, út frá sjónarhóli trans fólks,“ sagði Lilly og minntist þess að margt trans fólk hafi tengt við efni myndanna. „Það hefur komið upp að mér og sagt „Þessar myndir björguðu lífi mínu.“

„Ég er ánægð að það er nú komið á hreint að þetta var alltaf ætlunin. En viðskiptaheimurinn var ekki tilbúinn að vita það á sínum tíma.“

„Ég veit ekki hversu mikið það ver til staðar í hausnum á mér, að vera trans kona, þegar við skrifuðum myndina,“ sagði Lilly og bætti við að myndin fjalli um umbreytingu út frá sjónarhóli þess sem enn er í skápnum með sitt sanna sjálft.

Systir Lilly, Lana, mun standa í stafni við gerð fjórðu Matrix myndarinnar og munu aðalleikarar fyrri myndanna, Keanu Reeves, Carrie-Anne Moss og Jada Pinkett Smith snúa aftur í fyrri hlutverk.

Keanu Reeves hefur gefið út að það hafi verið vegna Lönu sem hann var tilbúinn að endurtaka leikinn.

„Lana Waschowski skrifaði dásamlegt handrit og frábæra sögu sem virkilega náði til mín“