Söngdívan Mariah Carey hefur skrifað endurminningar sínar og von er á þeim í september. Í bókinni, sem hlotið hefur titilinn The Meaning Of Mariah Carey, fer hún yfir æskuna og 30 ára feril sinn.
Á meðan Mariah sjálf ku vera spennt fyrir komu bókarinnar herma fregnir að sumir kvíði henni, þar á meðal aðilar sem hafa átt í erjum við dívuna í gegnum tíðina. Á þeim lista eru meðal annarra Eminem, Madonna, Nicki Minaj og J. Lo. Þegar Mariah var eitt sinn spurð út í skoðun sína á Jennifer Lopez svaraði hún stutt og laggott; „Ég veit ekki hver það er.“
Það er ekki að ástæðulausu að Mariah er kölluð díva. Hún er kröfuhörð og ansi hégómagjörn. Lítum á nokkur þekkt dæmi:
Það er stranglega bannað að tala við söngkonuna áður en hún stígur á stokk.
Ef skiptast þarf á upplýsingum er það gert skriflega eða með táknmáli svo hún hvíli röddina.
Að auki sefur hún með 20 rakavélar til að hlúa að raddböndunum.
Mariah strunsaði út úr innsetningarathöfn Obama því henni fannst fráleitt að hún sæti ekki á sama borði og forsetahjónin.
Árið 2005 átti söngkonan bókað á Baglioni hótelinu í London og þegar hún mætti á svæðið neitaði hún að fara út úr limmósínunni þar til lagður hafði verið rauður dregill með hvítum kertum.
Þetta köllum við almennilega dívutakta.