Blómey Ósk Karlsdóttir átti sér draum að taka þátt í fitness. Eftir að hafa eignast sitt fyrsta barn ákvað hún að slá til. Hún keppti á sínu fyrsta fitness móti þann 9. nóvember síðastliðinn og er hvergi hætt. Við ræddum við Blómey Ósk um hvað hún gerði og hvaða ráð hún gefur öðrum.
„Að keppa í fitness hafði verið draumur í mörg ár en ég hafði bara ekki komið mér í það. Svo var ég að vinna í sjálfri mér eftir að hafa átt fyrsta barnið mitt. Ég skráði mig í einkaþjálfun og þjálfarinn minn spurði hvort ég væri með eitthvað markmið. Akkúrat á þeim tímapunkti sagði ég að mig langaði að keppa í fitness í nóvember á næsta ári,“ segir Blómey Ósk.
Það var fyrir tæplega ári síðan. En hvað gerði hún eiginlega til að koma sér í hörkuform á aðeins ári.
„Mjög stór partur af þessu er mataræðið og líka það að vera ákveðinn í því sem maður ætlar að gera. Ég borðaði rosalega venjulega fyrstu mánuðina af þessu, engar öfgar. En þegar nær dró að keppni þá þarf maður auðvitað að passa sig betur,“ segir Blómey Ósk.
„Ég minnkaði allt nammi, gos, snakk og tók nánast út öll kolvetni. Ég prófaði ketó í þrjá mánuði og fylgdi síðan lágkolvetnamataræði. Í niðurskurðinum, sem var yfir síðustu tíu vikurnar fyrir mót, fylgdi ég mjög ströngu lágkolvetnamataræði.“
Hún bætir við að henni hafi liðið mjög vel á ketó og LKL. En síðustu vikurnar fyrir mót reyndust henni mjög erfiðar að sökum kolvetnaskorts. Aðspurð hvort það hafi verið erfitt að æfa á ketó eða LKL segir Blómey það vera mjög einstaklingsbundið. „Maður verður auðvitað aðeins orkuminni þegar nær dregur að keppni en mér gekk allavega rosalega vel, mér leið vel.“
https://www.instagram.com/p/B2ccH-qgw8p/
Blómey keppti í tiltölulega nýjum flokk, Wellness kvenna, á bikarmóti IFBB síðustu helgi. „Þetta er milliflokkur, milli bikiní og fitness,“ segir hún.
„Ég stefni næst á Íslandsmótið hjá IFBB á Íslandi um páskana á næsta ári.“
Við spurðum Blómey Ósk hvort hún hefði einhver ráð til þeirra sem vilja feta í hennar spor.
„Það er rosalega gott að hafa þjálfara í horninu hjá sér. Bæði því hann hjálpar manni með mikið sem maður veit ekki. En hann er líka kletturinn á bak við mann og það er svo gott að vita að einhver hafi trú á manni. Fyrst og fremst af öllu þarf maður að hafa trú á sjálfum sér að maður geti það,“ segir Blómey.
