Raunveruleikastjarnan Kim Kardashian veitti innsýn inn í glæsihýsi sitt í Kaliforníu í fyrsta sinn í myndbandi fyrir tímaritið Vogue fyrir stuttu. Nú klóra margir tístarar sér í höfðinu yfir einu atriði á heimilinu sem sást í myndbandinu – baðherbergisvöskunum.
Kim sýnir stærsta baðherbergið í húsinu í myndbandinu og er það til dæmis búið stóru baðkari sem er gott að hugga sig í. Hins vegar eru það vaskarnir sem fanga athygli fólks, eða vöntun á vöskum réttara sagt. Eins og sést á skjáskotinu hér fyrir ofan og neðan eru vissulega blöndunartæki á marmaraplötu en engir vaskar sjáanlegir.
Tístarar skilja hvorki upp né niður í þessu og þurfa nauðsynlega á útskýringum að halda, en engar slíkar hafa komið frá Kim sjálfri. Einn tístari veltir því fyrir sér hvort þetta sé rándýr marmarasvampur og spyr svo: „Hva, á fátækt fólk ekki svoleiðis?“
Annar tístari telur jafnvel að um „öryggisatriði“ sé að ræða svo Kim og Kanye „drukkni ekki óvart á meðan þau dást að spegilmynd sinni.“
Enn aðrir telja þessa rándýru hönnun algjörlega fáránlega og tilgerðarlega. Stóru spurningunni er hins vegar enn ósvarað – hvernig virkar þessi innrétting?
Umrætt myndband má sjá hér fyrir neðan:
