Þann 23. október síðastliðinn lést Magnús Andri Hjaltason langt fyrir aldur fram, en hann varð bráðkvaddur í sundlauginni í Grindavík. Magnús Andri og fjölskylda hans eru ötulir stuðningsmenn Alzheimersamtakanna, en Hjörtfríður Jónsdóttir, eiginkona Magnúsar Andra, greindist með Alzheimer árið 2012.

Magnús Andri vann í Tengi ehf. í 26 ár og var einn af lykilstarfsmönnum fyrirtækisins í vexti þess. Í minningu hans hyggst hópur fyrrverandi vinnufélaga hans hlaupa til styrktar Alzheimersamtökunum í Reykjavíkurmaraþoninu þann 18. ágúst næstkomandi.

„Magnús Andri hljóp í nokkur ár með hlaupahópnum Stingum af, sem hleypur fyrir Alzheimersamtökin,“ segir Arnar Árnason hjá Tengi ehf. „Þar var Maggi Andri afskaplega hár í áheitasöfnun og var hann áheitakóngur í fyrra. Hann var ötull stuðningsmaður til styrktar samtökunum og hefur unnið mjög vel í þeirra þágu, eins og hann gat samhliða því að aðstoða konuna sína, hana Hjöddu.“

Í febrúar síðastliðnum ákváðu samstarfsfélagar og vinir Magnúsar Andra að stofna hlaupahóp í minningu hans. „Við vildum halda kyndli hans á lofti, hann hafði sett sér það markmið að Stingum af myndi safna milljón og við höfum sett okkur það markmið að safna hálfri milljón þannig að saman ættum við að ná þessari milljón sem er markmiðið. Það er aðdáunarvert að sjá hve margir eru tilbúnir til að taka þátt og gefa í maraþoninu.“

Allir starfsmenn Tengis ehf. sem tök hafa á taka þátt. „Við gerðum okkur vonir um að tíu starfsmenn tækju þátt, en um leið og við lögðum þetta til voru allir sem tiltækir voru til í að vera með. Raunin er því sú að við erum 24, um 60 prósent starfsmanna fyrirtækisins. Hlauparar eru á öllum aldri, af báðum kynjum og í öllu formi. Hver og einn hleypur á sínu tempói, þrír fara hálfmaraþon og hinir 10 kílómetra.“

Tengi ehf. styður við alla starfsmenn með því að greiða þátttökugjald allra og styður við undirbúninginn. „Þetta hefur verið hvatning fyrir marga til að byrja að hreyfa sig. Við höfum verið að hvetja hvert annað, fara í hlaupagreiningu og fá tilboð á hlaupavörum fyrir okkur.

Andlát Magnúsar Andra var reiðarslag fyrir marga starfsmenn hér, hann var mikill húmoristi og þekkingarbrunnur, mjög vandaður maður,“ segir Arnar. „Við hvetjum alla sem geta til að styrkja þetta verðuga málefni, margt smátt gerir eitt stórt. „Munum þá sem gleyma“.“

Hægt er að styrkja Tengi ehf. og Alzheimer samtökin í Reykjavíkurmaraþoninu hér.