Aðalheiður Ásdís hefur allt sitt líf staðið í basli við aukakílóin en fyrir mörgum árum síðan greindist hún með fjölblöðruheilkenni og áunna sykursýki.

„Ég hef alltaf verið í stanslausu basli við aukakílóin, eða á maður kannski að segja auka manneskjuna sem ég hef borið utan á mér bróðir partinn af lífinu,“ segir Aðalheiður í fjölmennum hóp kvenna á Facebook sem er til þess gerður að hvetja þær til heilbrigðs lífsstíls.

Hjartalæknirinnn sagði Aðalheiði til syndanna

„Árin 2015 og 2016 voru bara toppurinn á þessu brjálæðislega góða líferni hjá mér. Þá náði ég gjörsamlega toppi mínum í þyngd og vanlíðan. Ég er steinhissa að það skuli vera til mynd af mér frá þessum tíma.“

Í janúar árið 2017 upplifði Aðalheiður þrot í lífi sínu og kynntist í kjölfarið lágkolvetna lífsstíl.

„Ég hætti í sambandi eftir átta ár og aldrei hefði mér dottið það í hug að þessi tími í lífinu sem var mér mjög erfiður, myndi vera það allra besta sem hefur komið fyrir mig. Í febrúar átti ég tíma hjá hjartalækni þar sem ég ætlaði að athuga stöðuna á minni hjartaheilsu vegna fjölskyldusögu minnar. Þar labbaði ég á vegg. Var sett á blóðþrýstingslyf og var tekin í gegn af lækninum sem sagði mér hreinlega til syndanna. Þarna stóð ég á toppi þyngdar, á þunglyndislyfjum, lyfjum til þess að meðhöndla áunnu sykursýkina og fékk svo blóðþrýstingslyf líka. Ekki orðin þrjátíu ára gömul.“

Búin að losa sig við lyfin með réttu mataræði

Læknirinn greindi Aðalheiði frá því að ef hún myndi ekki gera eitthvað í sínum málum undir eins þá yrði hún eilífðar sjúklingur.

„Hann rétti mér blað með staðreyndum um hvað best væri að gera í minni stöðu matarræðislega séð og var það lágkolvetna lífsstíll. Alla tíð hef ég verið á móti lágkolvetna mataræði þar sem ég hef endurtekið fyrir sjálfri mér að heilinn þurfi kolvetni. En þarna setti ég allt til hliðar og ákvað að kynna mér þetta til hins ýtrasta.“

Aðalheiður fór strax að sjá árangur og einungis nokkrum mánuðum síðar hafði hún misst heil 20 kíló.

„Ásamt því að missa heil 20 kíló náði ég að losa mig við þann fjanda að þurfa að taka lyf við lífsstíls heilsubrestum mínum. Í dag er ég lyfjalaus. Ég held langtíma blóðsykri, þunglyndinu og blóðþrýstingnum í skorðum með mataræðinu einu.“

Það er meiri vinna að vera sjúklingur

Aðalheiður viðurkennir þó að ferlið sé ekki búið að vera auðvelt.

„Þetta er ekki búin að vera auðveld ganga, þetta er vinna. En ég skal segja ykkur eitt, það er meiri vinna að vera sjúklingur.“

Velgengni Aðalheiðar fékk hana til þess að vilja hjálpa öðru fólki í sömu stöðu og stofnaði hún hóp á Facebook sem heitir Lágkolvetna Góðgæti.

Ásamt því opnaði Aðalheiður Snapchat reikning sinn þar sem hún deilir uppskriftum sem tengjast lágkolvegna lífsstíl og er hægt að fylgjast með henni undir notandanafninu: allyapple7

„Ef einhver er í vafa eða í svipaðri stöðu og ég var í fyrir rúmlega ári þá vil ég bara segja ykkur eitt. Lífið er ekki búið, þetta er hægt. Það þarf bara að taka skrefið. Í dag, rúmlega ári seinna er ég búin að finna sjálfa mig í mataræði, elska vinnuna mína, búin að kynnast ástinni í lífi mínu og gifta mig í þokkabót. Lífið er núna, það er bara þannig.“