Ingibjörg Rósa gefur ritstjórn tekjublaðs Frjálsrar verslunar falleinkunn og gagnrýnir notkun starfsheita í blaðinu. Þar koma fyrir orð á borð við „fjölmiðlamenn,“ „embættismenn“ og „skólamenn“. Ingibjörg bendir á frekar eigi að nota orðið „fólk“ í staðinn fyrir „menn,“ eins og „fjölmiðlafólk.“

Það er málhefð að nota t.d. „lögmaður“ (þótt ekkert mæli í raun á móti því að nota „lögkona“) en með óljósari titla eins og „embættismaður“ er ekkert sem segir að ekki megi nota „embættiskona“ og því eðlilegra að nota „embættisfólk“ sem fleirtölu. Orðskrípið „skólamenn“ er hins vegar allt annar handleggur! Ég tel samt að sjálfsögðu að konur séu líka menn, málhefðin er samt annað mál,

segir Ingibjörg í samtali við Bleikt. Hún deildi færslu á Facebook með nokkrum myndum úr tekjublaði Frjálsrar verslunar þar sem hún er búin að gera ýmsar breytingar á textanum í blaðinu.

„Kæra ritstjórn Tekjublaðsins, ég er búin að fara yfir og leiðrétta. 2/10 er falleinkunn, sérstaklega þar sem dregið er frá fyrir hryllilega nýyrðasmíð í lokadæminu. Þið fáið sem sagt NÚLL en getið spreytt ykkur aftur að ári…“

Skrifaði Ingibjörg í færslunni. Hér fyrir neðan má sjá myndirnar.

Það hafa nokkrir skrifað undir færsluna. Hér má sjá tvö ummæli:

„Af hverju má ekki segja –kona eða –karl eftir starfsheiti. Ég tala um listakonu og listamann og þingkonu og þingmann. Ég tala ekki um menn þegar ég tala um konur. Tungumál er lifandi fyrirbæri og í því felst þróun í anda samtímans. Ef það má ekki breyta því þá get ég alveg eins sagt flugfreyja um karla líka og ljósmóðir um karla í því starfi. Störfin hafa breyst og eru ekki jafn kynjaskipt og þau voru og tungumálið aðlagar sig að því.“

„Menn eru bæði kvenmenn og karlmenn. Ég tala um þau öll sem menn – og fólk. En þegar ég vil aðgreina kynin sérstaklega tala ég um konur og karla.“