Þeir sem verða að þola einelti gleyma því ekki. Það á líka við um stjörnurnar í Hollywood. Skólafélagar Steven Spielberg kölluðu hann nörd, Tom Cruise var strítt vegna þess að hann glímdi við lestrarerfiðleika og Kate Winslet var kölluð feitabolla. Og þær þrjár heimsfrægu stjörnur sem fjallað er um hér á síðunni urðu fyrir miklu aðkasti í skóla vegna þess að þær þóttu vera öðruvísi og féllu ekki inn í hópinn. Á þeim sannaðist að sá hlær best sem síðast hlær. Skólafélagarnir sem níddust á þeim á sínum tíma vildu í dag örugglega vera í þeirra sporum.

Jennifer Lawrence

Óskarsverðlaunaleikkonan varð fyrir svo miklu einelti sem barn að hún skipti margoft um skóla. Í gagnfræðaskóla niðurlægði skólasystir hennar hana þegar hún fékk hana til að hjálpa sér við að dreifa afmælisboðskorti til skólafélaganna, en Lawrence var ekki boðið í það afmæli.

Winona Ryder

Winona Ryder varð fyrir grófu ofbeldi í skóla. Nokkrir skólafélagar hennar réðust á hana, slógu höfði hennar við dyr og þegar hún féll í jörðina spörkuðu þeir í hana og börðu hana. Eftir atvikið var henni vísað úr skóla meðan hinir ungu ofbeldisseggir héldu áfram skólagöngu eins og ekkert hefði í skorist. Seinna, þegar Ryder var orðin fræg Hollywood-stjarna, gekk einn ofbeldismannanna að henni á kaffihúsi og bað hana um eiginhandaráritun. Hún spurði hann hvort hann myndi eftir að hafa gengið í skrokk á skólasystur sinni á árum áður. Hann sagði að sig rámaði í það. „Þetta var ég, farðu til fjandans,“ sagði Ryder.

Sandra Bullock

Móðir Söndru Bullock var óperusöngkona og tók dóttur sína með sér í ferðalög til Evrópu. Þegar Bullock sneri aftur í skólann í Bandaríkjunum var henni miskunnarlaust strítt vegna klæðnaðar síns, sem var mjög evrópskur. Bullock segist enn muna nöfnin á öllum þeim krökkum sem hæddu hana og lumbruðu á henni.

-Kolbrún Bergþórsdóttir
Birtist fyrst á DV.is