Aron Ingi Davíðsson gaf í gær út lagið NOGO, sem er fyrsta lag hans eftir að hann hætti í Áttunni.

„Lagið fjallar um að vera hrifin af stelpu sem á að vera með „slæmt orðspor,“ þetta klassíska bad girl vibe. Fólk getur túlkað lagið á sinn átt, það hafa allir lent í því að það hafi verið dreift sögum um þá sem eru sannar eða ekki. Í laginu þá hlusta ég ekki á hvað aðrir segja því ég þykist ekki vita það sem ég veit ekki,“ segir Aron Ingi.

Lagið kemur út á Spotify í næstu viku, en einnig er Aron Ingi að vinna að fleiri lögum sem koma út á næstunni. Á Facebooksíðu hans birtir hann reglulega grínsketsa og á næsta ári heldur hann til Los Angeles til að læra kvikmyndagerð.

„Ég verð að fá að þakka Lárus Erni Arnarsyni, Inga Þór Bauer og Ásgeiri Orra. Við töluðum fyrst um að gera þetta lag í desember í fyrra og hefur það verið í vinnslu síðan í febrúar, þannig að þetta hefur verið langt ferli. Þeir eru að mínu mati hæfileikaríkustu tónlistarmenn landsins og hafa þurft að þola mikið áreiti af minni hálfu. Ég vil líka biðja Pálma, Sæþór og Steinar innilegrar afsökunar á að hafa ruðst inn í mitt sess korter í útgáfu, þeir vita um hvað ég er að tala!“

Fylgjast má með Aroni Inga á Facebooksíðu hans og heimasíðu.