Stefán er fæddur 1966 og hefur starfað við tónlist meira eða minna frá tvítugsaldri. Hann skipaði sér fljótlega á bekk með þekktustu söngvurum þjóðarinnar og hefur hin auðþekkjanlega rödd Stefáns ómað reglulega úr viðtækjum landsmanna allar götur síðan. Hann hefur frá fyrstu tíð einnig látið til sín taka sem tón- og textahöfundur og liggja eftir Stefán á fjórða hundrað útgefin verk, en auk þess að semja fyrir sig og sína hefur hann samið töluvert fyrir aðra þjóðþekkta flytjendur. Á þessu ári fagnar hljómsveit Stefáns, Sálin hans Jóns míns, 30 ára starfsafmæli, en sú sveit hefur hljóðritað á annan tug hljómplatna. Þá hefur Stefán sent frá sér sjö plötur undir eigin nafni, auk platna með ýmsum öðrum. Hann hefur hlotið ýmsar viðurkenningar í gegnum árin, m.a. Íslensku tónlistarverðlaunin, jafnt sem söngvari og höfundur. Stefán hefur sinnt félagsstörfum nokkuð, sat m.a. um skeið í stjórn Félags tónskálda og textahöfunda og hefur undanfarin ár setið í stjórn Kvennaskólans.
Karen Elísabet Halldórsdóttir, formaður lista og menningarráðs, Stefán Hilmarsson og Ármann Kr. Ólafsson bæjarstjóri.
Við útnefninguna lýsti Stefán yfir þakklæti og sagði þetta tækifæri til að láta gott af sér leiða í bæjarfélaginu, en hann hefur verið Kópavogsbúi í ríflega 20 ár. „Í fyrsta lagi vil ég gjarna bjóða eldri borgurum til ókeypis tónleika í Salnum og mun það gert í minningu Láru ömmu minnar, sem lést í hárri elli s.l. haust. Ég veit að þessi hópur er svolítið út undan og of lítið sinnt þegar kemur að menningarmálum. En ég vil einnig horfa til æskunnar og langar í samvinnu við Tónlistarskóla Kópavogs að bjóða efnilegum nemum að taka þátt í tónleikum sem hugmyndin er að setja upp í sambandi við Barnamenningarhátíð næsta vor. Samhliða því vil ég freista þess að efna til sönglagakeppni, þar sem skapandi nemendum gefst tækifæri til að fá lag eftir sig flutt á þessum tónleikum.“
Það var Karen Elísabet Halldórsdóttir, formaður lista- og menningarráðs sem afhenti Stefáni innrammað skjal til staðfestingar tilnefningunni að viðstöddum bæjarstjóra Ármanni Kr. Ólafssyni. Undir lok athafnarinnar tók Stefán lagið við fögnuð viðstaddra.
