Fáir komast með tærnar þar sem norski glæpasagnahöfundurinn Jo Nesbø hefur hælana. Nesbø er ekki vanur að bregðast þegar kemur að því að búa til áhugaverða sögu með eftirminnilegum persónum og skapa spennu. Hann er í algjörum sérflokki þegar kemur að glæpasagnahöfundum Evrópu. Það var því með nokkurri eftirvæntingu sem maður settist fyrir framan sjónvarpið síðastliðið þriðjudagskvöld til að fylgjast með norska spennuþættinum Hernám en Nesbø er hugmyndasmiður þáttanna og það eitt og sér hljóta að teljast meðmæli. Þættirnir eru tíu og eigi að marka fyrsta þátt þá er hér afbragðsefni á ferð.

Hugmyndin er sannarlega góð. Noregur hættir olíu- og gasframleiðslu úr Norðursjónum í verndunarskyni en Rússar reyna að neyða Norðmenn til að hefja vinnslu að nýju. Þar svífast Rússarnir einskis og eru greinilega í miklu stuði. Í fyrsta þætti rændu þeir norska forsætisráðherranum en skiluðu honum aftur eftir að hafa hótað honum. Lögreglumaður, sem heitir því fallega nafni Djupvik, kemur forsætisráðherranum til hjálpar. Blaðamaður finnur lykt af stórfrétt og reynir að komast á sporið en gengur illa.

Þáttur sem byrjar svona vel getur varla klikkað. Þetta mun vera dýrasti sjónvarpsþáttur sem Norðmenn hafa framleitt þannig að mikið er í hann lagt. Hann hefur verið seldur til fjölmargra landa. Ekki veit ég hvort hann hefur verið seldur til Rússlands, finnst það reyndar ólíklegt miðað við að Rússarnir eru þar vondu mennirnir. Rússneski forsetinn í fyrsta þættinum minnti mjög á Pútín og virtist sannarlega ekki vera neinn gæðagæi.

Það verður fróðlegt að fylgjast með framvindunni í Hernámi. Spennan er örugglega bara rétt að byrja.