RÚV fagnar páskum með sýningu á Stríði og friði, breskri þáttaröð í fjórum hlutum sem gerð er eftir snilldarverki Lev Tolstoj. Þetta eru stjörnum prýddir þættir. Með hlutverk hinnar töfrandi og lífsglöðu Natöshu fer Lily James, sem íslenskir sjónvarpsáhorfendur þekkja sem lafði Rose í Downton Abbey. Paul Dano leikur hinn klaufalega og hjartahlýja Pierre og James Norton leikur glæsimennið Andrei. Þau standa sig öll vel en senuþjófar þáttanna eru Gillian Anderson, Jim Broadbent og Greta Saachi, sem eru í aukahlutverkum en láta áhorfendur sannarlega taka eftir sér.

Þættirnir voru teknir upp í Rússlandi, Lettlandi og Litháen og umgjörðin er öll stórbrotin. Þættirnir gerast í Rússlandi á Napóleonstímanum. Þarna eru mögnuð bardagaatriði jafnt sem glæsilegar senur úr samkvæmislífi aðalsins. Þættirnir fengu gríðarlega góða dóma þegar þeir voru sýndir á Bretlandi og gagnrýnendur voru ósparir í stjörnugjöf. Þetta er glæsilegt búningadrama sem íslenskir áhorfendur ættu að njóta.

Samkvæmt könnun í Bretlandi sem gerð var um svipað leyti og sýningar hófust á þáttunum höfðu 4 prósent Breta lesið Stríð og frið. Þættirnir höfðu þau áhrif að þessi mikla skáldsaga tók að seljast í bókaverslunum og komst í fimmtugasta sæti á breska bóksalalistanum. Stríð og friður er löng skáldsaga og sagt er að það taki meðalmann, sem er í fullri vinnu, eitt og hálft ár að lesa hana – en þá er miðað við að hann sé ekki ýkja mikill lestrarhestur. Sannir lestrarhestar eru ekki nema nokkrar vikur að lesa þetta stórvirki.

Sýningar á þáttunum hófust fimmtudaginn 24. mars.