Bókin Búðarferðin eftir Ósk Ólafsdóttur og Bergrúnu Írisi Sævarsdóttur sýnir glögglega að þegar ímyndunaraflið fær að leika lausum hala getur allt gerst. Bergrún Íris myndskreytti söguna en hún hefur síðustu ár getið sér gott orð í myndlistarheiminum.

Í upphafi bókarinnar fara söguhetjurnar Blær og Busla út í búð að kaupa mjólk. Búðarferðin á þó eftir að reynast einstaklega viðburðarík en hinar ýmsu verur, völundarhús og snarbrött fjöll verða á vegi þeirra. Ævintýraheimurinn sem þær skapa í sögunni fangar töfrandi hugmyndaflug barna nokkuð vel.

Búðarferðin er ekki eina bók Bergrúnar í jólabókaflóðinu en nafn hennar er á kápum sjö bóka sem voru gefnar út á árinu. Þar á meðal myndskreytti Bergrún barnabókina Hin æruverðuga og ættgöfuga hefðarprinsessa fröken Lovísa Perlufesti Blómasdóttir – Daprasta litla stúlka í öllum heiminum eftir glæpasagnahöfundinn Stefán Mána.

Búðarferðin er ætluð yngsta lesendahópnum og söguhetjan Blær gæti, líkt og nafnið gefur til kynna, bæði verið strákur eða stelpa. Lesandinn sjálfur getur tekið ákvörðun um það. Texti bókarinnar er stuttur en segir það sem segja þarf. Ævintýrið felst nefnilega fyrst og fremst í listaverkum Bergrúnar Írisar sem glæða orðin lífi.